Enmarcada no proceso de peche da Unidade de Transferencia Embrionaria de Bos, o pasado Venres día 9 de Setembro e nas instalacións da Finca de Bos, en Guísamo, A Coruña, celebrouse a XVII Subhasta Top-Bos na que se puxeron á venda 24 femias do Programa de Mellora Gandeira de Galicia.

Os animais subastados, procedentes das mellores familias de vacas do mundo e con altos índices xenómicos, despertaron o interese dos criadores de Galicia que, -a pesar da complicada situación económica que atravesa o sector,- apostaron decididamente pola súa adquisición. O prezo medio da poxa foi de 5.517€, sendo os animais máis cotizados, a xovenca Bos Shottle DINORA (familia Diamonds) 8 xeracións MB ou EX, adquirida por 10.700€ por SAT San Vicente de Niveiro, Val do Dubra, A Coruña, seguida pola becerra Bos Super AMARYLLIS ET, da Familia Ashlyn que con 8 meses de idade e unha proba xenómica de +2.078 GTPI e +3,30 PTAT, foi adquirida por 8.200€ por Gandeiria Cid, SC de Barreiros, Lugo; a mesma cantidade pagou Granxa Vidueira pola xovenca de 15 meses, Bos Million CINTIA (familia Aeroflower) 10 xeracións MB ou EX, cuio índice xenómico é de +2.073 GTPI sendo +3,18 PTAT. Outros tres animais acadaron os 8.000€.

Xunto co noso agradecemento ós compradores, pola confianza que nos demostran poxa tras poxa, así como ás persoas e institucións que colaboran con nós (Clube de Xóvenes Gandeiros, Fundación Semana Verde, Concello de Bergondo, etc,…), queremos recordarlles que, o próximo día 28 de Outubro celebraremos a XVIII (e última) Subhasta Top-Bos, poñendo con ela punto final ó Programa de Colaboración que, ó longo destes últimos 20 anos, mantivo a Consellería do Medio Rural cos Criadores de Frisón Selecto de Galicia, na xestión e desenvolvemento da Unidade de Transferencia Embrionaria de Bos.

Resultados
Guisamo - Bergondo, 9 de Setembro de 2011